ԱՊՀ երկրներում միջպետական հետախուզման մեջ գտնվող Հայաստանի նախկին պաշտպանության նախարար գեներալ լեյտենանտ Միքայել Հարությունյանի նկատմամբ հետախուզումը չեղարկվել է ՌԴ տարածքում, հաղորդում է Ինտերֆաքսը՝ հղում կատարելով իրազեկ աղբյուրին:

«2008 թվականին Երեւանում մարտի 1-ի գործով մեղադրվող Հարությունյանի նկատմամբ նյութերն ուսումնասիրելուց հետո որոշում է կայացվել չեղարկել նրա հետախուզումը ՌԴ տարածքում»,-ասել է գործակալության զրուցակիցը: Այդկերպ, պարզաբանել է նա, Ռուսաստանում Հարությունյանին ոչինչ չի սպառնում:

Աղբյուրը նաեւ նշել է, որ պաշտպանության նախկին նախարարին ձերբակալելու եւ արտահանձնելու մասին հայցը Մոսկվան ստացել էր որոշ ժամանակ անց ոչ թե Հայաստանի Գլխավոր դատախազությունից, այլ միջպետական հետախուզման կողմից: Ձերբակալման մասին ստացված փաստաթղթում նշված է նաեւ Ռուսաստանի մայրաքաղաքում մեղադրյալին տնային կալանքի տակ առնելու մասին կետը:

Ավելի վաղ Ինտերֆաքսի մեկ ուրիշ աղբյուրը հայտնել է, որ Հարությունյանի արտահանձնման հարցը կմերժվի, քանի որ 2002 թվականից նա ունի ռուսական անձնագիր:

Հայաստանի նախկին պաշտպանության նախարար գեներալ լեյտենանտ Հարությունյանը մեղադրվում է Սահմանադրությունը խախտելու եւ սահմանադրական կարգը տապալելու փորձի մեջ:

Չելյաբինսկի մարզի Զլատոուստ քաղաքում հայկական սփյուռքի ներկայացուցչի՝ 22-ամյա հայ գործարարի սպանության մեջ կասկածվողը հանձնվել է ոստիկանությանը։ Քննիչները Դավիթ Խուդոյանի սպանության եւս մեկ վարկած են առաջադրել, տեղեկացնում են Ռուսաստանի Չելյաբինսկի մարզի ՔԿ-ում, հաղորդում է «ԱիՖ Չելյաբինսկը»-ը։

«Այսօր սպանության մեջ կասկածվողը ինքն է եկել ոստիկանություն,- ասել է Ռուսաստանի Չելյաբինսկի մարզի ՔԿ քննչական վարչության ղեկավարի օգնական Վլադիմիր Շիշկովը։- Ներկայում կատարվում են անհրաժեշտ քննչական գործողություններ, ինչից հետո կկայացվի ընթացակարգային որոշում»։

Հիշեցնենք, որ  զլատոուստցի 22-ամյա Դավիթ Խուդոյանին սպանել են օդամուղ ատրճանակով։ Երկուշաբթի գիշեր երիտասարդին հասցրել են հիվանդանոց, որտեղ նա ստացած վերքից մահացել է։ Երկու կասկածյալի հանդեպ հետախուզում է հայտարարված։

Ռուսական «Ռոսիա 24» պետական միջազգային շուրջօրյա հեռուստաալիքը ռեպորտաժ է պատրաստել այն մասին, որ Հայաստանի Սահմանադրական դատարանը հետաձգել է երկրորդ նախագահ Ռոբերտ Քոչարյանի գործով դիմումների քննարկումը:

«Հայաստանի երկրորդ նախագահ Ռոբերտ Քոչարյանի 2 դիմումների նախնական քննարկումը՝ նրան առաջադրած մեղադրանքների Սահմանադրությանը համապատասխանելու մասին, Հայաստանի Սահմանադրական դատարանը կսկսի սեպտեմբերի 3-ին: Դատարանը կքննի նախկին նախագահի պաշտպանության դիմումները՝ ըստ նրա մեղադրանքի զրպարտության հանցանշանների եւ  հանցագործություն պատրաստելու վերաբերյալ: Քոչարյանը մեղադրվում է սահմանադրական կարգի տապալման եւ կաշառք տալու մեջ»,- նշված է ռեպորտաժում:

«Ինքը նախկին նախագահը իր դեմ մեղադրանքները քաղաքականապես մոտիվացված է համարում եւ ցանկանում է հասնել Սահմանադրական դատարանում քրեական գործի դադարեցմանը:

…Նախկին նախագահին ազատած դատավորի դեմ քրեական գործ է հարուցվել, որը կապ չունի նրա մասնագիտական գործունեության հետ: Հանրապետության նախկին առաջին դեմքի նկատմամբ քրեական հետապնդում է իրականացվում 2018 թվականից, հենց այդ ժամանակ են նրան առաջադրել սահմանադրական կարգի տապալման եւ կոռուպցիայի մեղադրանքներ:

Սահմանադրական դատարանն օգտվել է իր իրավունքից եւ խորհրդատվություն ստանալու համար դիմել Ինչպես Վենետիկի հանձնաժողովին, այնպես էլ Մարդու իրավունքների եվրոպական դատարանին: Այդպիսի քննարկումն, անկասկած, կարող է վեր հանել այս քրեական գործի օրինականության եւ հիմնավորվածության իրավական հարցեր, քանի որ գաղտնիք չէ, որ նախկին նախագահ Քոչարյանը եւ ներկայիս վարչապետ Փաշինյանը միշտ եղել են բարիկադների տարբեր կողմերում՝ միմյանց հանդեպ քաղաքական ընդդիմություն լինելով»,- նշված է ռեպորտաժում:

Ռուսական РЕН ТВ հեռուստաալիքն անդրադարձել է Հայաստանի Հանրապետության երկրորդ նախագահ Ռոբերտ Քոչարյանի դատական գործին: Նշվում է, որ Հայաստանի իշխանությունները դատավորների վրա ճնշում են գործադրում Քոչարյանի գործի առնչությամբ:

«Տեղի արդարադատությունը մեկ անգամ չէ, որ նրան անմեղ է ճանաչել, սակայն, չնայած ամենին, իշխանություններն անընդհատ նոր պատճառներ են գտնում Քոչարյանին ճաղերի ետևում պահելու համար: Այժմ նրանք ուղղակի կերպով դատավորներին են հետապնդում, նրանց դեմ քրեական գործեր են հարուցվում, հալածանքներ իրականացվում մամուլի միջոցով»,- ասված է համապատասխան հոդվածի տեքստում:

Հեռուստաալիքը հիշեցնում է, որ 2008թ.-ի մարտին նախագահական ընտրություններում խախտումների վերաբերյալ բողոքի ակցիաները զանգվածային անկարգությունների էին վերածվել, ամբոխը սկսել էր ջարդուփշուր անել ու այրել խանութները, ծեծել ոստիկաններին, իսկ Քոչարյանը, որն այդ ժամանակ երկրի ղեկավարն էր, ճգնաժամը դադարեցնելու համար արտակարգ դրություն էր մտցրել:

«Այժմ ստացվում է, որ Փաշինյանը, որն այն ժամանակ ճաղերի ետևում էր հայտնվել, վրեժ է լուծում՝ փորձելով հասնել նրան, որ Քոչարյանը մեղավոր ճանաչվի իշխանության ուզուրպացիայի համար: Անհեթեթ է հնչում. երկրի գործող նախագահն արտակարգ դրություն հայտարարելու իրավունք ուներ, դրա համար էլ դատավորները փորձում են հանել մեղադրանքը, Փաշինյանը, սակայն, թույլ չի տալիս»,- նկատում է հեռուստաալիքը:

Հոդվածի համաձայն՝ երկրի Սահմանադրական դատարանը մինչ այժմ ընդդիմանում է Քոչարյանին հետապնդելու փորձերին և արդյունքում երկու նախագահ ունի՝ Հրայր Թովմասյանը, որն ի սկզբանե այդ պաշտոնում է եղել, և Վահե Գրիգորյանը, որին «նշանակել են վերևից»:

Հեռուստաալիքն ընդգծում է, որ Սահմանադրական դատարանի անդամներին, ցմահ և բավականին բարձր կենսաթոշակով գայթակղելով, առաջարկում են ինքնակամ հեռանալ, որպեսզի նրանց փոխարինեն ավելի կառավարելի կադրերով:

Եզրափակելով հեռուստաալիքը նշում է, որ վարչապետ Նիկոլ Փաշինյանն իրեն է ենթարկել լրատվամիջոցներին, օրենսդիր և գործադիր մարմիններին, իսկ այժմ ամեն ինչ տանում է դեպի դատարանների անկախության վերացման:

Նշենք, որ ՀՀ երկրորդ նախագահի գործով նոր նիստը, ինչպես հույս են հայտնել նրա փաստաբանները, տեղի կունենա այս հինգշաբթի, եթե հերթական անգամ չհետաձգվի:

Շախմատի Ադրբեջանի հավաքականի անդամ, 33-ամյա գրոսմայստեր Գադիր Գուսեյնովը մեկնաբանել է շախմատի Հայաստանի չեմպիոն, միջազգային կարգի վարպետ Մարիա Գեւորգյանի՝ Թուրքիայի մրցաշարի մասնակիցների թվից ադրբեջանցիների պահանջով հեռացնելու միջադեպը:

Ադրբեջանցի գրոսմայստերը ոչ պաշտոնական պատասխան նամակով դիմել է Մարիա Գեւորգյանին՝ թողնելով բացատրական մեկնաբանություն հայ շախմատիստուհու ֆեյսբուքյան հրապարակման տակ:

Ըստ Գադիր Գուսեյնովի, կատարվածի մեղավորությունը կազմակերպիչ կողմինն է՝ Թուրքիայինը:

«Բարեւ Մարիա: Երեկ ես ծանոթացա այս միջադեպին եւ շուրջ 3 ժամ ուսումնասիրեցի այս պատմությունը: Ես խոսեցի մրցաշարի խաղացողների, մրցաշարի հիմնական կազմակերպիչների եւ տնօրենի հետ, իմ ֆեդերացիայի հետ: Սա լիովին կազմակերպիչների մեղքն է եւ սադրանք է: Ես լիարժեք տեղեկատվություն ունեմ այս պատմության մասին: Ադրբեջանի շախմատի ֆեդերացիան կապ է հաստատել Թուրքիայի շախմատի ֆեդերացիայի հետ եւ բողոքել կազմակերպիչներից:

Թուրքիայի շախմատի ֆեդերացիան խոստացավ զբաղվել այս իրավիճակով: Ըստ իմ տեղեկությունների, Թուրքիայի շախմատի ֆեդերացիայի նախագահը մեկնել է այնտեղ: Ադրբեջանցի խաղացողները ոչ մի խնդրագիր չեն ստորագրել: Կար միայն մեկ էլեկտրոնային նամակ խաղացողից, որը ՖԻԴԵ վարկանիշով 1709 է: Սա փաստաթուղթ չէ կամ հատուկ ինչ-որ բան: Եթե կազմակերպիչները լսում են մեկ խաղացողի հիմար խնդրանքը, որը FIDE վարկանիշով 1709 է (թեեւ ընդհանրապես նշանակություն չունի 1709-ն է, թե 2800-ը: ) նրանց համար դա մեծ ամոթ է եւ հստակ սադրանք: Ակնհայտ է, որ նրանք շահագրգռված չէին ապահովել իրեն խոստացած պայմանները ՝ ավիատոմսը եւ կացարանը, այդ պատճառով նրանք գտան դրանից օգտվելու լավ առիթ: Անկեղծ ասած, ես շատ զարմացած եմ, թե ինչու են մարդիկ կիսվում այս պատմությունով կամ մեկնաբանում այն, որովհետև դա զրոյական տեղեկատվություն է երկրորդ կողմից»,- գրել է ադրբեջանցի գրոսմայստեր Գադիր Գուսեյնովը։

Կրասնոդարի երկրամասում՝ Արմավիր քաղաքի մոտակայքում, ողբերգական վթարի հետևանքով ՀՀ քաղաքացիներ են զոհվել: Զոհվել են Արմավիրի բնակիչ, Nissan Qashqai-ի 65-ամյա վարորդը, ինչպես նաեւ Opel ավտոմեքենայում գտնված երեք մարդ՝ Հայաստանի քաղաքացիներ 35-ամյա վարորդը, 31-ամյա եւ 81-ամյա ուղեւորուհիները, հաղորդում է «Կուբանսկիե նովոստի»-ն:
Գործակալությունը մանրամասնում է, որ մինիվենի 9-ամյա ուղեւորուհին, որը եւս Հայաստանի քաղաքացի է, տեղափոխվել է Արմավիրի քաղաքային հիվանդանոց:

Ըստ տեղեկությունների՝ վթարից զոհված 81-ամյա ուղեւորը Մարգուշ Հովհաննիսյանն է, որ երկար տարիներ ուսուցչուհի է աշխատել Զորական գյուղի դպրոցում։
Ոստիկանության աշխատակիցները պարզում են դեպքի հանգամանքները:
Ավտովթարը տեղի է ունեցել օգոստոսի 23-ին, ժամը 17.40-ի շրջանում «Կավկազ» դաշնային ավտոճանապարհի 172-րդ կիլոմետրում՝ Զավետնի գյուղի մոտ:
Ավելի վաղ «Կուբանսկիե նովոստի»-ն հաղորդել էր, որ Արմավիրի մերձակայքում միմյանց են բախվել Nissan Qashqai քրոսովերն ու Opel Zafira մինիվենը: Վթարի հետեւանքով զոհվել է 4 մարդ՝ երկու ավտոմեքենաների վարորդներն ու մինիվենի երկու կին ուղեւորները:

Ամերիկաբնակ երկու հայեր՝ 88-ամյա Պարգև Ղազարյանը և նրա որդի Կարո Ղազարյանը, Թուրքիայի դեմ դատական հայց են ներկայացրել այն բանից հետո, երբ այդ երկրի հարավում գտնվող իրենց հայրենի գյուղ այցելելու համար դեսպանատնից մերժում են ստացել, գրում է rusarminfo.ru-ն՝ Asbarez պարբերականին հղումով:

Պարգև Ղազարյանը, որը ծնվել է 1931թ.-ին թուրքական Կալանդուրան գյուղում, 2017թ.-ին որոշել էր ծննդավայր վերադառնալ՝ «քրիստոնեական ծեսեր կատարելու»: Այս նպատակով նա դիմել է Վաշինգտոնում Թուրքիայի դեսպանատուն՝ վիզայի դիմումի մեջ նշելով իր ազգությունը և կրոնական պատկանելիությունը:

Թուրքիայի դեսպանատունը մերժել է հայր և որդի Ղազարյանների վիզան: Ինչպես նշում են հայցվորների դատապաշտպանները, պատճառը նրանց հայկական ծագումն է եղել:

Նշվում է, որ Պարգև Ղազարյանի համար դա արտերկիր մեկնելու վերջին հնարավորությունն է եղել՝ հաշվի առնելով նրա տարիքն ու առողջական վիճակը: Դատական հայցում տարեց տղամարդը մեղադրում է Թուրքիային մի շարք միջազգային կոնվենցիաների և համաձայնագրերի խախտման համար:

«Արգենտինահայերի մշակութային միությունը»  դատապարտել է Թուրքիայի ներքաղաքական վերջին իրադարձությունները, որոնց հետևանքով  պաշտոնից հեռացվել են Թուրքիայի ընդդիմադիր քրդամետ «Ժողովուրդների դեմոկրատական» կուսակցությունը ներկայացնող Դիարբեքիրի, Վանի և Մարդինի քաղաքապետները։ Այս մասին տեղեկացնում ermenihaber.am-ը:

Այս պահին քաղաքապետների պարտականությունները ժամանակավորապես իրականացնում են Մարդինի, Վանի և Դիարքբեքիրի նահանգապետները: Նրանք նշանակվել են որպես ժամանակավոր պաշտոնակատարներ։

Հայկական միության հայտարարության մեջ մասնավորապես ասվում է.

«Եկեք ուժեղացնենք պայքարը Էրդողանի ֆաշիստական ռեժիմի դեմ։ Էրդողանի կառավարությունն ապօրինաբար է աշխատանքից հեռացրել քրդամետ կուսակցության քաղաքապետներին։ Այս պետությունը  կիրառում է  այն տրամաբանությունը, որով առաջնորդվում էր Հայոց ցեղասպանության տարիներին։  Պետությունն այժմ փորձում է հարված հասցնել երկրում կարևոր դեր ունեցող ձախակողմյան ուժերին, ինչպես նաև Թուրքիայի խորհրդարանի 3-րդ ուժին»։

Նշվում է նաև, որ ինչպես անցյալում, այնպես էլ հիմա, թուրքական իշխանությունները շարունակում են ճնշել ազգային փոքրամասնություններնին:

«Եթե նախկինում հայերն էին, ապա հիմա այդ վիճակի մեջ քրդերն են ընկել»։

Ղրղզստանի նախկին նախագահ Ալմազբեկ Աթամբաեւը եւ նրա թիկնապահները որպես կասկածյալներ ներգրավված չեն նրա տան գրոհի ժամանակ հատուկջոկատայինի սպանության մեջ: Այս մասին հայտնել է 24.kgգործակալությունը՝ վկայակոչելով սեփական աղբյուրին:

«Քննչական մարմինը պարզել է տղամարդու անձը, ով սպանել է ԱԱՊԿ հատուկ նշանակության «Ալֆա» ջոկատի փոխգնդապետ Ուսենբեկ Նիյազբեկովին: Հայտնի է, որ կասկածյալներ չեն համարվում ո՛չ նախկին նախագահ Ալմազբեկ Աթամբաեւը, ո՛չ նրա թիկնապահները: Նախնական տեղեկություններով՝ Ուսենբեկ Նիյազբեկովին գնադակահարել են իր իսկ ինքնաձիգով: Հայտնի է նաեւ, որ կասկածյալին ձերբակալել են»,- նշված է հաղորդագրության մեջ:

Աթամբաեւը, ով մեղադրվում է կոռուպցիայի մեջ եւ անձեռնմխելիությունից զրկվել է, օգոստոսի 8-ին ձերբակալվել էր Չույսկի մարզի Կոյ-Տաշ գյուղի իր նստավայրում գրեթե մեկ օր տեւած հատուկ գործողության ժամանակ: Օգոստոսի 13-ին Ղրղզստանի գլխավոր դատախազությունը հայտնել էր, որ Աթամբաեւին մեղսագրվում են իրավապահ մարմինների աշխատակիցների նկատմամբ բռնության կիրառման, զանգվածային անկարգությունների կազմակերպման, սպանությունների, սպանության փորձի, իրավապահ մարմինների աշխատակցի սպանության եւ պատանդառության կազմակերպման հանցարարքներ:

Կոնգրեսի ընդդիմությունը դեմ է ԱՄՆ նախագահ Դոնալդ Թրամփի վարչակազմի փորձերին՝ միտված կրճատելու Արցախին տրվող ֆինանսական օգնությունը: Ինչպես տեղեկացրին Ամերիկայի հայկական ազգային կոմիտեից, 143 մլն ամերիկացիներին ներկայացնող, 16 նահանգներից 22 սենատոր այսօր միացել են ԱՄՆ 89 ներկայացուցիչներին, ովքեր անցած շաբաթվա ընթացքում կյանքեր փրկող ծրագրի օգտին նամակ են ստորագրել:

Սենատի նամակը, որը գլխավորում է սենատոր Մենենդեսը, կոչ է անում USAID ադմինիստրատոր Մարկ Գրինին՝ փոխել որոշումը և շարունակել Արցախի ականազերծման՝ ԱՄՆ կողմից ֆինանսավորվող ծրագիրը:

«Սենատորների հուժկու արձագանքը վկայում է այս մարդասիրական ծրագրի լայն աջակցություն վայելելու մասին: Մենք երախտապարտ ենք հայտնում սենատոր Մենենդեսին՝ իր սկզբունքայնության համար և բոլոր սենատորներին, ովքեր ներկայացնում են 143 մլն ամերիկացիների, և, ովքեր կարճ ժամանակում խաղաղությանը նպաստող ներդրումների օգտին միտված դիրքորոշում ընդունեցին»,- նշել է Ամերիկայի հայկական ազգային կոմիտեի գործադիր տնօրեն Արամ Համբարյանը: