Լուրեր
Արխիվ

Արխիվ

Իրավունք
Գագիկ Խաչատրյանն արտոնություններ չի ստեղծո՞ւմ իր որդիների համար (տեսանյութ) Մայիս 21, 2013 | 15:54

«Թրանսփարենսի ինթերնեշընլ» հակակոռուպցիոն կենտրոնի ներկայացուցիչ Հերիքնազ Տիգրանյանը «Վարկած» ակումբում լրագրողների հետ հանդիպմանը հայտարարեց, որ ձեռնարկատիրական ապօրինի գործողությունների իրականացման հիմքով Պետական եկամուտների կոմիտեի նախագահ Գագիկ Խաչատրյանի հարցով Բարձրաստիճան պաշտոնատար անձանց էթիկայի հանձնաժողովից ստացած պատասխանն իրենց համար սպասելի էր, իրենք ավելին չէին էլ ակնկալում: Միևնույն ժամանակ Հ. Տիգրանյանի դիտարկմամբ՝ հանձնաժողովը որոշակի գործողություններ, այնուամենայնիվ, կատարել է:

«Գոհացնում է այն, որ երևում է` Էթիկայի հանձնաժողովը կատարել է որոշակի աշխատանք` հարցումներ, որոշակի հետաքննական աշատանքներ, սակայն  այդ աշխատանքները հեռու են կատարյալ լինելուց»,- ասաց Տիգրանյանը` նշելով, որ հանձնաժողովն այդ ընթացքում գործել է օրենսդրական լիազորությունների` իրեն տրված հնարավորությունների շրջանակում:

Ներկայացնելով եզրակացությունը` «Թրանսփարենսի ինթերնեշնլի» ներկայացուցիչն ասաց, որ իրենք նշել էին մոտ տասը ընկերություններ, որոնք կապվում են Գագիկ Խաչատրյանի կամ նրան կապակցված անձանց հետ, սակայն Էթիկայի հանձնաժողովի տված պարզաբանումների մեջ հիշատակված է ընդամենը վեց ընկերություն, որոնք այս կամ այն կերպ առնչվում են Խաչատրյանի ազգականներին կամ մերձավոր հարազատներին:

Տիգրանյանը նշեց, որ համաձայն եզրակացության` «Ապերոն» և «Մեգամոթորս» ընկերությունների անմիջական մասնակիցները Գագիկ Խաչատրյանի զավակներն են, իսկ «Մեգաֆուդ», «Մեգասպորտ», «Խրոնոգրաֆ», Ucom ընկերությունների բաժնետերեր կամ սեփականատեր համարվում են ՊԵԿ նախագահի հորաքրոջ կամ հորեղբոոր զավակները:

«Մեր օրենսդրության համաձայն` հորաքրոջ կամ հորեղբոր զավակները չեն համարվում փոխկապակցված անձիք, սա նաև գուցե մեր օրենքի բացն է»,- ասաց հակակոռուպցիոն կենտրոնի ներկայացուցիչը` նշելով, թե այս պատճառով է, որ հանձնաժողովը եզրակացրել է, որ ՊԵԿ նախագահն այդ ընկերությունների հետ չի գտնվել շահերի բախման իրավիճակում:

Սակայն Տիգրանյանը նշեց, որ Էթիկայի հանձնաժողովը եզրակացության երկրորդ կետում նշել է, թե մնացած այն դեպքերում, երբ ՊԵԿ նախագահն իր լիազորությունների շրջանակում կկատարի որևէ գործողություն կամ կընդունի որևէ որոշում, որը կանդրադառնա «Ապերոն» կամ «Մեգամոթորս» ընկերությունների իրավական ռեժիմի վրա, ապա հանձնաժողովը պետք է ներկայացնի հնարավոր շահերի բախման վերաբերյալ տեղեկություն, որպեսզի մարմինը տա իր համապատասխան գնահատականը:

Անակնկալ նվեր՝ սպանության տեսքով Մայիս 21, 2013 | 15:36

Արզումանյան փողոցում վարձակալված բնակարանում մատուցողուհու՝ Մարիամ Հունանյանի, դաժան սպանության գործով ոստիկանության բաժին է բերման ենթարկվել նաեւ սպանությունը կատարելու կասկածանքով ձերբակալված Դավիթ Թամրազյանի ընկերուհին՝ 22-ամյա Միլենան։

Սպանության պատճառը եղել է Դավիթի եւ Մարիամի միջանձնային հարաբերությունները, ինտիմ կապը, որոնք Մարիամը չի ցանկացել դադարեցնել։ Համենայն դեպս, «Փաստինֆո»-ի ունեցած տեղեկություններով, այսպես է փորձել կատարվածը պատճառաբանել Դավիթը։

Դավիթի եւ Մարիամի հարաբերություններն ունեցել են մի քանի ամսվա պատմություն։ Նրանք ծանոթացել են 2012 թվականի աշնանը եւ անցած ամիսների ընթացքում գտնվել են ինտիմ կապի մեջ։ Կասկածյալի մատուցմամբ, չցանկանալով շարունակել հարաբերությունները, դրանք դադարեցնելու իր մտադրության մասին հայտնել է Մարիամին, ով դեմ է եղել եւ զանգերի միջոցով պահանջել նոր հանդիպումներ։ Հերթական հանդիպման ժամանակ էլ լսել է, թե ինչպես է Մարիամն իրենց ընդհանուր ծանոթուհուն ասել, թե իբր Դավիթի մայրն անբարոյական է եւ մարմնավաճառությամբ է երեխաներին պահել մեծացրել։ Հենց այս խոսքերն էլ շատ խորն են «խոցել» Դավիթին, ով որոշել է վրեժխնդիր լինել։ Դավիթը խոստովանել է, որ սպանելու դիտավորությամբ վերցրել է խոհանոցային դանակ եւ գնացել Մ.Հունանյանի տուն։ Ի դեպ, նշենք, որ Դ.Թամրազյանը մասնագիտությամբ խոհարար է եւ աշխատել է տարբեր ռեստորանահյուրանոցային համալիրներում։ Դեպքի օրը Դավիթը զանգել է ոչ միայն Մարիամին՝ նրան հանդիպելու համար, այլ նաեւ իր ընկերուհուն՝ Միլենային եւ ասել, որ տաքսի ավտոմեքենայով գա Արզումանյան փողոցում գտնվող դպրոցի մոտ՝ առանց բուն պատճառը նշելու։

Մեր ունեցած տեղեկություններով, Դավիթը մանրամասն նկարագրել է կատարված սպանությունը, այդ թվում նշելով, որ շենքի մոտ սպասել է մինչեւ Մարիամի վերադառնալը, ապա միասին տուն են բարձրացել, իսկ զգոնությունը թուլացնելու համար սիրաշահել է, համբուրել։ Բուն սպանությունը կատարել է անակնկալ նվեր մատուցելու պատճառաբանությամբ։ Ասել է, թե անակնկալ նվեր ունի՝ խնդրելով փակել աչքերը, իսկ երբ խնդրանքն արդեն կատարված է եղել, ծոցագրպանից հանել է դանակը եւ կտրել աղջկա պարանոցը։ Ապա՝ լվացվել, հետքերը թաքցնելու նպատակով հրկիզել բնակարանը եւ դուրս եկել։ Հասնելով դպրոցի մոտ՝ նստել է ընկերուհու վարձած տաքսին եւ հեռացել։ Մեր ունեցած տեղեկություններով ավելի ուշ Դավիթը կատարվածի մասին պատմել է նաեւ ընկերուհուն, ով, ինչպես արդեն նշել ենք, նույնպես բերման է ենթարկվել եւ հարցաքննվել։

Թե որքանով է իրականությանը համապատասխանում իրադարձությունների զարգացման կասկածյալի նշած վարկածը, թերեւս քննությամբ կստուգվի։ Առավել եւս, երբ առկա են դրանք ստուգելու բավական ակնհայտ տարբերակներ, հենց թեկուզ հեռախոսազանգերի վերծանումը։

Նշենք, որ այս գործով նախկինում արդեն կեղծ ինքնախոստովանության դեպք արձանագրվել է։ Մեր ունեցած տեղեկություններով, մինչեւ Դ.Թամրազյանին ձերբակալելը մի աղջիկ արդեն «խոստովանել էր», թե ինքն է սպանել Մարիամին։ Աղջիկը ձերբակալվել էր, սակայն գործը կալանավորելուն չէր հասել, քանի որ, մեր ունեցած տեղեկություններով, մեղադրանքի առաջադրմանը դեմ է եղել դատախազը՝ աղջկա ցուցմունքները որակելով ոչ արժանահավատ։ Աղջիկը չէր կարողացել անգամ նկարագրել սենյակը, որտեղ տեղի էր ունեցել սպանությունը։ Իսկ թե չկատարած սպանությունն ինչու էր փորձել իր վրա վերցնել՝ կարծում ենք նույնպես պետք է դառնա քննության առարկա։

Փաստինֆո

Վարդան Սեդրակյանը կտրականապես չի ընդունում մեղադրանքը Մայիս 20, 2013 | 17:45

ՀՀ նախագահի նախկին թեկնածու Վարդան Սեդրակյանն իրեն բացարձակապես մեղավոր չի ճանաչում ՀՀ նախագահի նախկին թեկնածու Պարույր Հայրիկյանի սպանության փորձը կազմակերպելու իրեն առաջադրված մեղադրանքում և համաձայն չէ մեղադրանքի հետ: Այս մասին Երևանի Կենտրոն և Նորք-Մարաշ վարչական շրջանների դատարանի՝ դատավոր Գագիկ Պողոսյանի նախագահությամբ, այսօրվա դատական նիստում հայտարարեց ամբաստանյալը:

Նրա պաշտպան Ալեքսանդր Սիրունյանն էլ հայտարարեց, որ իրեն հասկանալի չեն մեղադրանքի հիմքերը, մասնավորապես, անհասկանալի է, թե ապացույցներից որն է վերաբերվում իր պաշտպանյալին:

Իսկ ամբաստանյալ, քաղաքական գործչի սպանության փորձը կատարելու ու ապօրինի զենք պահելու մեջ մեղադրվող Խաչատուր Պողոսյանը մեղադրանքն ընդունեց մասնակի՝ ապօրինի զենք պահելու մասով: Նա նշեց նաև, որ ինքը սպանության փորձ չի կատարել, պարզապես վախեցրել է: Ամբաստանյալ Սամվել Հարությունյանն իր հերթին հայտարարեց, որ սպանության փորձի պատվեր չի եղել, «ուղղակի վախեցրել ենք»:

Վ.Սեդրակյանի պաշտպանը բազմանշանակ հայտարարություն արեց առ այն, որ ինքը բացարկ ունի գործով դատախազի դեմ, իսկ ՀՀ գլխավոր դատախազության ազգային անվտանգության մարմինների կողմից քննվող և կիբերհանցագործությունների գործերով ավագ դատախազ Արամ Ամիրզադյանը գործով դատախազ չէ՝ ըստ ՀՀ դատախազության մասին օրենքի, դատախազը՝ Հովսեփ Սարգսյան, չէր կարող փոխվել: Արամ Ամիրզադյանն ապացուցեց հակառակը՝ օրենսդրական մանրակրկիտ էքսկուրս կատարելով: Նա ընդգծեց, որ ինքը գործով պատշաճ մեղադրող է, և որ ինքը դատավարական հսկողությունը սկսել է իրականացնել մեղադրական եզրակացությունը հաստատելուց մեկ ամիս առաջ:

Ըստ դատարանի սահմանած ապացույցների հետազոտման կարգի, կհարցաքննվեն վկաները, ապա տուժողը, կհետազոտվեն գործի գրավոր ապացույցները և վերջում կհարցաքննվեն ամբաստանյալները:

Այսօր հարցաքննված միակ վկան ամբաստանյալ Խ.Պողոսյանի զոքանչ Կարինե Էլչակյանն էր: Նա հայտարարեց, որ իր փեսան շատ հավասարակշռված, շատ նորմալ մարդ է՝ այդ թվում՝ որպես ամուսին և հայր: Ըստ նրա, թմրամիջոցների օգտագործելու ու իրացմանն օժանդակելու համար դատվածությունը նրա մեծ սխալն է եղել, և ինքը դրա համար պատիժ կրել է: Ըստ զոքանչի, եթե իրեն մեղսագրվող արարքն իր փեսան արել է, ուրեմն դա արել է Վարդան Սեդրակյանի դրդմամբ, իր փեսայի միակ թերությունը ազդեցության տակ ընկնելն է: Ըստ վկայի, Պարույր Հայրիկյանն ու Վարդան Սեդրակյանն անձնական խնդիր ունեն, սակայն այդ մասին ավելին չցանկացավ հայտնել:

Դատարան էին ներկայացել ևս 3 վկաներ, որոնք առանց դատարանին տեղյակ պահելու, սեփական նախաձեռնությամբ հեռացել էին դատարանից: Դատական նիստին չէին ներկայացել նաև պատշաճ ծանուցված այլ վկաներ՝ բացառությամբ Պարույր Հայրիկյանի տիկնոջից ու դստերից, ովքեր կներկայանան հունիսի 1-ի դատական նիստին, մյուս վկաները բերման կենթարկվեն: Առաջիկայում դատարան կներկայանա նաև Պարույր Հայրիկյանն, ով ներկայումս Հայաստանում հետվիրահատական բժշկական հետազոտություն է անցնում:

Դատարանն այսօրվա նիստում բավարարեց պաշտպան Ալեքսանդր Սիրունյանի միջնորդությունը՝ ընտանիքի անդամների հետ իր պաշտպանյալի տեսակցությունների արգելքը վերացնելու մասին՝ միջնորդության դեմ մեղադրողը չառարկեց: Դատարանը որպես վաղաժամ արված միջնորդություն որակեց ամբաստանյալներին դատաբժշկական-հոգեբանական ու նարկոլոգիական համալիր փորձաքննություն ենթարկելու պաշտպանական կողմի միջնորդությունը՝ կողմը ցանկության դեպքում կարող է այն ներկայացնել որպես դատաքննությունը լրացնող միջնորդություն:

Փաստինֆո

Արկադի Վարդանյանը և նրա թիկնապահը կասկածվում են վերջինիս հորը թունավորելու մեջ Մայիս 20, 2013 | 15:09

Ինչպես ավելի վաղ, «Հայկական Վարկած»-ը տեղեկացրել էր, այսօր ձերբակալվել են Արկադի Վարդանյանը և նրա նախկին թիկնապահը:

ԱԱԾ-ն արդեն հանդես է եկել պաշտոնական հայատարարությամբ, որում ասվում է, որ Ազգային  Անվտանգության ծառայության կողմից իրականացված  միջոցառումների արդյունքում ս.թ մայիսի 18-ին  Երևան քաղաքում ձերբակալվել են Արսեն  Ռոբերտի Ավետյանը և Արկադի Արշավիրի Վարդանյանը, որոնք կասկածվում են Արսեն Ավետյանի հոր` Ռոբերտ Աբրահամի Ավետյանի սպանությունը նախապատրաստելու մեջ:

Ըստ ձեռք բերված տվյալների` Արսեն Ավետյանը և Արկադի Վարդանյանը  պլանավորել, միջոցներ են ձեռք բերել և պայմաններ ստեղծել Ռոբերտ Ավետյանին  թունավորելու միջոցով նրա գույքին տիրանալու համար:

Իրավասու մարմինների կողմից  օրենքով սահմանված պատշաճ իրավական ընթացակարգի  շրջանակներում ստացված  տեղեկությունների հիման վրա դեռևս 2013թ. մայիսի 17-ին հարուցվել էր  քրեական գործ ՀՀ քրեական օրենսգրքի 35-104 հոդվածի 2-րդ մասին 7-րդ և 8-րդ կետերի հատկանիշներով / մի խումբ անձանց կողմից շահադիտական դրդումներով սպանության  նախապատրաստություն/:

Նախաքննությունը կատարում է ՀՀ ԱԱԾ քննչական վարչությունը:

Կատարվել են մի շարք անհետաձգելի քննչական գործողություններ: Ներկայումս նախաքննության մարմինը քննարկում է կասկածյալներին մեղադրանք  առաջադրելու, նրանց արարքներին իրավական գնահատական տալու, ինչպես նաև խափանման միջոց  ընտրելու հարցերը:

Քրեական գործի քննության վերաբերյալ հետագա տեղեկատվությունը  կտրամադրվի հաշվի առնելով նախաքննության բնականոն ընթացքի և  համակողմանիության միաժամանակյա ապահովման անհրաժեշտությունը:

 

Արկադի Վարդանյանը ձերբակալվել է Մայիս 20, 2013 | 14:33

«Հայկական Վարկած»-ի հավաստի տեղեկություններով, այսօր ձերբակալել են քաղաքագետ Արկադի Վարդանյանին և նրա նախիկ թիկնապահին:

Հանգամանքները պարզվում են:

 

Գոմեշի մսի հայտնաբերման փաստի առթիվ հարուցված քրեական գործով նախաքննությունը ավարտական փուլում է Մայիս 18, 2013 | 15:03

ՀՀ ՊՆ ՔԾ ՀԿԳ քննչական բաժնի վարույթում ՀՀ ՊՆ պարենային բազայի պահեստում կատարված ստուգումների արդյունքում գոմեշի մսի հայտնաբերման փաստի առթիվ քննվող քրեական գործով 07.05.13թ. որոշում է կայացվել ՀՀ քր. օր-ի 178-րդ հոդվածի 3-րդ մասի 1-ին կետով մեղադրյալ Ալբերտ Օհանջանյանի նկատմամբ խափանման միջոց կալանավորումը փոփոխելու մասին:

Հաշվի առնելով հանրության հետաքրքրությունը, զինվորական դատախազությունը տեղեկացնում է, որ խափանման միջոցը փոփոխելու մասին որոշման համար հիմք է հանդիսացել այն, որ Ա.Օհանջանյանը տառապում է <<շաքարային դիաբետ, արյան շրջանառության սուր անբավարարություն, զարկերակային հիպերտենզիա>> հիվանդություններով, գտնվելով կալանքի տակ երկու անգամ սրտի կաթված է տարել և նա տեղափոխվել է <<Էրեբունի>> բժշկական կենտրոն, որտեղ ստացիոնար բուժում է ստացել: Բժշկական կենտրոնում նրա մոտ ախտորոշվել է «Ձախ փորոքի առաջային պատի սրտամկանի ստորին սուր ինֆարկտ: Վաղ հետինֆարկտային ստենոկարդիա: Արյան շրջանառության սուր կանգային անբավարարություն: Զարկերակային հիպերտենզիա: Վիճակ կորոնար անոթի ստենդավորումից հետո»: Այնուհետև Ա.Օհանջանյանը տեղափոխվել է «Դատապարտյալների հիվանդանոց» քրեակատարողական հիմնարկ, որտեղ սակայն հնարավոր չի եղել ապահովել նեղ մասնագիտական բուժում, առկա չեն նաև նման հիվանդությամբ տառապող անձանց պարբերական հետազոտման և հիվանդության ախտորոշման համար անհրաժեշտ բժշկական սարքավորումները:

Մեղադրյալ Ա.Օհանջանյանի կողմից միջոցներ են իրականացվել իր իսկ կողմից պետությանը պատճառված նյութական վնասը վերականգնելու ուղղությամբ: Բացի այդ մեղադրյալի հետ կապված բոլոր անհրաժեշտ քննչական գործողություններն այս պահին ավարտվել են և ազատության մեջ մնալով մեղադրյալ Ա.Օհանջանյանը չի խոչնդոտի մինչդատական վարույթում կամ դատարանում գործի քննությանը` քրեական դատավարությանը մասնակցող անձանց վրա անօրինական ազդեցություն գործադրելու, գործի համար նշանակություն ունեցող նյութերը թաքցնելու կամ կեղծելու կամ այլ ճանապարհով:

Վերջին նկատառումներից ելնելով փոփոխվել են նաև մյուս մեղադրյալների նկատմամբ ընտրված խափանման միջոցները:

Քրեական գործի նախաքննությունը գտնվում է ավարտական, դատարան ուղարկելուց առաջ ձեռք բերված ապացույցների վերլուծության այլ ապացույցների հետ համադրման, գործի լուծման համար բավարարության տեսանկյունից գնահատման փուլում:

Զինվորի սպանության գործով Դավիթ Խաչատրյանը կներգրավվի որպես մեղադրյալ Մայիս 18, 2013 | 13:51

Ժամկետային զինծառայող Լյուքս Ստեփանյանի սպանության դեպքի առթիվ հարուցված քրեական գործի նախաքննությամբ օպերատիվ ձեռնարկված միջոցառումների արդյունքում պարզվել են միջադեպի մի շարք հանգամանքներ։

ՀՀ Գլխավոր դատախազությունից հայտնում են, որ հաշվի առնելով հանրության հետաքրքրությունը՝ ՀՀ զինվորական դատախազությունը տեղեկացնում է, որ ըստ նախաքննության տվյալների՝ 15.05.2013թ՝ ժամը 15:30-ի սահմաններում թիվ N զորամասի 1-ին պահակախմբի մուտքի դիտորդ, նույն զորամասի ԿՍ-19 ժամկետային զինծառայող, շարքային Դավիթ Խաչատրյանը վիճաբանության մեջ է մտել պահակախմբում ընդգրկված ԿՍ-19 ՀԴՆ-ի ժամկետային զինծառայող, շարքային Լյուքս Ստեփանյանի հետ, որի ժամանակ շարքային Դ.Խաչատրյանն իրեն ամրակցված ԱԿՄ տեսակի ինքնաձիգից կրակել է շարքային Լ.Ստեփանյանի ուղղությամբ, որի արդյունքում վերջինս գլխի շրջանում ստացած հրազենային վնասվածքից տեղում մահացել է, իսկ նույն ՀԴՆ-ի ժամկետային զինծառայող, շարքային Հրաչյա Սարգսյանը գլխի շրջանում ստացել է հրազենային վնասվածք և տեղափոխվել Նոյեմբերյանի քաղաքային հիվանդանոց:

Փաստի առթիվ 15.05.2013թ-ին ՀՀ ՊՆ ՔԾ 6-րդ կայազորային քննչական բաժնում’ ՀՀ քր. օր-ի 104 հոդ-ի 2-րդ մասի 6-րդ կետով նախատեսված հանցագործության հատկանիշներով հարուցվել է քրեական գործ և նախաքննության կատարումը հանձնարարվել է քննչական խմբի:
15.05.2013թ.-ին Դավիթ Խաչատրյանը ՀՀ քր. օր-ի 104 հոդ-ի 2-րդ մասի 6-րդ կետով նախատեսված հանցագործության կատարման կասկածանքով ձերբակալվել և որպես կասկածյալ հարցաքննվել է:

Քրեական գործով կատարվել է դեպքի վայրի զննություն, դիակի արտաքին զննում և այլ անհետաձգելի քննչական ու դատավարական գործողություններ, հետազոտման համար վերցվել են նմուշներ, նշանակվել է դատաբժշկական և դատաձգաբանական փորձաքննություններ, ինչպես նաև հարցաքննվել են պահակախմբի՝ դեպքի պահին պահակակետում գտնված բոլոր զինծառայողներրը:

Այսօր՝ 18.05.2013թ որոշում է կայացվել Դավիթ Խաչատրյանին ՀՀ քր. օր-ի 104 հոդ-ի 2-րդ մասի 6-րդ կետով և ՀՀ քր. օր-ի 112 հոդ-ի 1-ին մասով որպես մեղադրյալ ներգրավելու մասին, ինչպես նաև որոշում է կայացվել Դավիթ Ռաֆայելի Խաչատրյանի նկատմամբ կալանավորումը որպես խափանման միջոց ընտրելու միջնորդություն դատարան ներկայացնելու մասին:

Դավիթ Խաչատրյանը պահվում է ՀՀ ՊՆ Վանաձորի ՌՈ բաժնի մեկուսարանում:

Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով’ դատարանի’ օրինական ուժի մեջ մտած դատավճռով:

Հայկական դատարանի ֆենոմենը. նոր սենսացիոն որոշում Մայիս 18, 2013 | 11:02

ՀՀ ներքաղաքական կյանքում մեծ աղմուկ հանած քրեական գործով անցնող մեղադրյալի վերաբերյալ վերջերս դատարանը կայացրել է սենսացիոն որոշում. փոխվել է մեղադրյալի խափանման միջոցը և կալանավորվածն ազատ է արձակվել: Չկարծեք սակայն, թե խոսքը ընդդիմադիր ակտիվիստ Տիգրան Առաքելյանի մասին է: Քավ լիցի: Խոսքը պետությանը 200 հազար դոլարի վնաս, հասցնելու քրեական գործով անցնող կալանավորվածների մասին է: Իսկ դուք ասում եք, ՀՀ դատարանները խափանման միջոց կալանքը փոխելու միջնորդությունները մերժում են:

Հայկական ժամանակ

Ընտրախախտման երկու դեպք 07/18 ընտրատեղամասում Մայիս 17, 2013 | 18:53

Գլխավոր դատախազությունից հայտնում են, որ 2013թ. մայիսի 5-ին` Երևանի ավագանու ընտրությունների օրը, Ոսկեվազ գյուղում հաշվառված Ս.Սերոբյանի կողմից թիվ 07/18 ընտրատեղամասում այլ անձի փոխարեն քվեարկելու փորձ կատարելու դեպքի առթիվ հարուցված քրեական գործի նախաքննությամբ բացահայտվել է նույն ընտրատեղամասում այլ անձի փոխարեն քվեարկելու ևս մեկ դեպք:

ՀՀ ոստիկանության Երևան քաղաքի Մալաթիայի քննչական բաժնում հարուցված քրեական գործի նախաքննությամբ մասնավորապես պարզվել է, որ Ս.Սերոբյանը, ընդգրկված չլինելով   թիվ 07/18 ընտրատեղամասի ընտրացուցակներում, փորձել է   մասնակցել Երևան քաղաքի ավագանու ընտրություններին եւ քվեարկել այլ անձի փոխարեն, ինչը կանխվել է տեղամասային ընտրական հանձնաժողովի անդամի կողմից։

Նախաքննության տվյալներով` Ոսկեվազի բնակիչ Ս.Սերոբյանին քվեաթերթիկ և ծրար է տվել հիշյալ ընտրատեղամասի հանձնաժողովի մեկ այլ անդամ` Լ.Դավթյանը` ընտրողների ցուցակում ընդգրկված այլ անձի անվան դիմաց լրացնելով  Ս.Սերոբյանի անձնագրի տվյալները:

Ձեռնարկված օպերատիվ-քննչական գործողությունների արդյունքում պարզվել է նաև, որ Լ.Դավթյանն օժանդակել է նշված ընտրատեղամասում Արագածոտնի մարզի Ոսկեվազ գյուղում հաշվառված մեկ այլ բնակչի քվեարկությանը ևս:

Այսպես` Լ.Դավթյանը ընտրատեղամասի մատյանում տվյալ ընտրատեղամասի ընտրողներից մեկի անվան դիմաց լրացրել է Ոսկեվազում հաշվառված Վ.Թորոսյանի  անձնագրի տվյալները և վերջինիս տվել քվեաթերթիկ ու ծրար: Վ.Թորոսյանը, քվեաթերթիկ և ծրար ստանալով, քվեարկել է այլ անձի փոխարեն: Ի դեպ, Լ.Դավթյանը ևս Արագածոտնի մարզի Ոսկեվազ գյուղի բնակիչ է:

Ձեռք բերված ապացույցների հիման վրա Լ.Դավթյանին մեղադրանք է առաջադրվել` ՀՀ քրեական օրենսգրքի 38-153-րդ և 38-34-153-րդ հոդվածներով, իսկ Վ.Թորոսյանին` ՀՀ քրեական օրենսգրքի 153-րդ հոդվածով:

Հիշեցնենք, որ Ս.Սերոբյանին մեղադրանք էր առաջադրվել 2013թ. մայիսի 13-ին ` ՀՀ քրեական օրենսգրքի 34-153-րդ հոդվածով:

Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

 

Էթիկայի հանձնաժողովն օրենք է խախտո՞ւմ Մայիս 17, 2013 | 13:28

Բարձրաստիճան պաշտոնատար անձանց էթիկայի հանձնաժողովից տեղեկացանք, որ Պետական եկամուտների կոմիտեի նախագահ Գագիկ Խաչատրյանի նկատմամբ հարուցված վարույթն ավարտված է:

Վարույթի ավարտին հանձնաժողովը պետք է բացահայտեր կա՞ արդյոք շահերի բախում Խաչատրյանի անվան հետ կապվող բիզնեսների և նրա զբաղեցրած պաշտոնեական դիրքի միջև:

Հարցին, թե ինչ որոշում է կայացվել, և հայտնաբերվել են արդյո՞ք խախտումներ, հանձնաժողովից պատասխանեցին, թե բանավոր տեղեկատվություն չեն տրամադրում, փոխարենը հավելեցին, որ կայացված որոշման մասին կողմերը ծանուցվել են:

Հիշեցնենք. Էթիկայի հանձնաժողովը ՊԵԿ-ի նախագահի նկատմամբ վարույթ էր հարուցել «Թրանսփարենսի Ինթերնեշնըլ» հակակոռուպցիոն կենտրոնի դիմումի հիման վրա, որում, վկայակոչելով մամուլի հրապարակումները, «Թրանսփարենսի Ինթերնեշնըլ»-ը հայտնում էր, որ Գագիկ Խաչատրյանին են պատկանում հաշվիչ դրամարկղային կտրոնների թուղթ մատակարարող «Ալեքսերվ» ընկերությունը, նրա անվան հետ են կապվում նաև սննդամթերքի ներկրմամբ զբաղվող «Ապեյրոն», «Մեգաֆուդ» ընկերությունները, «Գալաքսի» սուպերմարկետը և նույն անունով հացի գործարանը, «Մեգամոթորս» ընկերությունը, «Մեգա սպորտ» խանութների ցանցը, «Խրոնոգրաֆ» թանկարժեք ժամացույցների խանութ սրահը, ֆիքսված հեռախոսակապ, ինտերնետ, արբանյակային հեռարձակում ապահովող «Յուքոմ» ընկերությունը, Ամասիայի կաթի գործարանը, «Ալյանս» մաքսային տերմինալը:

Փաստորեն, կողմերը տվյալ պարագայում «Թրանսփարենսի Ինթերնեշնըլ»-ն ու ՊԵԿ-ն են: «Թրանսփարենսի Ինթերնեշնըլ»-ում մեզանից տեղեկացան, որ իրենց դիմումի հիման վրա հարուցված վարույթն ավարտվել է և նշեցին, որ որևէ ծանուցում չեն ստացել: Ստացել են արդյո՞ք, ՊԵԿ-ում, մեր հարցմանն այս պետական կառույցից դեռ չեն պատասխանել:

Նշենք, որ էթիկայի հանձնաժողովը ՊԵԿ-ի նախագահի նկատմամբ վարույթ հարուցելու մասին որոշում էր կայացրել ապրիլի 13-ին, և քանի որ օրենքը մեկամսյա ժամկետ է սահմանում այն ավարտելու համար, ապա առավելագույնը մայիսի 13-ին Հանձնաժողովը պետք է կայացներ որոշումը: Որոշման կայացման ամսաթիվը ևս հանձնաժողովից չհստակեցրին, հավելելով, որ որոշումը կայացվել է մայիս ամսին:

Հանրային ծառայությունների մասին ՀՀ օրենքի 44 հոդվածի 4-րդ կետի համաձայն, «Բարձրաստիճան պաշտոնատար անձի կողմից էթիկայի կանոնների խախտման վերաբերյալ եզրակացությունը և դրա հիման վրա համապատասխան պետական մարմնի լիազոր անձի որոշումը, եթե այդպիսին առկա է, տվյալ որոշումը կայացնելու օրվան հաջորդող 5 աշխատանքային օրվա ընթացքում տեղադրվում է տվյալ պետական մարմնի կայքէջում»:

Ստացվում է, որ վարույթի ավարտին կայացված որոշումն արդեն իսկ պետք է տեղադրված լիներ Հանձնաժողովի կայքում, բայց չկա: Այդ պետական կառույցից պարզաբանեցին, որ խնդիրը տեխնիկական է: «Տեխնիկական պատճառով, չենք կարողանում տեղադրել»,- ասացին:

Ի դեպ, ՊԵԿ-ի նախագահի նկատմամբ հարուցված վարույթը պարզվում է կիակը չէ: Ինչպես մեզ ասացին Հանձնաժողովից, դրան զուգահեռ վարույթ է հարուցվել նաև Վանաձորի քաղաքապետի Սամվել Դարբինյանի նկատմամբ: Այս վարույթի որոշումը նույնպես արդեն կա, բայց կայքում չի տեղադրվել դարձյալ նույն պատճառաբանությամբ:

Նշենք, որ անկախ պատճառաբանության հիմնավոր լինելու հանգամանքից, սա դիտվում է իբրև Հանրային ծառայությունների մասին ՀՀ օրենքի խախտում, քանի որ այլ բան օրենքը չի նախատեսում:

2012 թվականի հունվարի 9-ին ստեղծված Բարձրաստիճան պաշտոնատար անձանց էթիկայի հանձնաժողովի ավելի քան մեկամյա աշխատանքում ՊԵԿ-ի Գագիկ Խաչատրյանի և Վանաձորի քաղաքապետ Սավել Դարբինյանի նկատմամբ կատարված վարույթներն առայժմ միակն են:

Փաստինֆո

Top լուրեր

Загружаем курсы валют от minfin.com.ua