Հունիսի 10-ին` ժամը 18:00-ի սահմաններում, ՊԲ հարավարևելյան ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից մահացու հրազենային վիրավորում է ստացել ՊԲ պայմանագրային զինծառայող, 1992թ. ծնված Վահագն Ջոնիկի Էլոյանը:

Դեպքի մանրամասները պարզելու համար կատարվում է քննություն:

Ազգային ժողովն այսօր հավանության արժանացրեց Նիկոլ Փաշինյանի ղեկավարած Կառավարության ծրագիրը:
Համապատասխան որոշմանը կողմ քվեարկեց 62, դեմ՝ 39 պատգամավոր:
ԱԺ նախագահ Արա Բաբլոյանը շնորհավորեց վարչապետ Նիկոլ Փաշինյանին:
Հիշեցնենք, որ ԱԺ «Ելք», ՀՅԴ և «Ծառուկյան դաշինք» խմբակցությունները հայտարարել էին, որ կողմ են քվեարկելու նախագծին, իսկ «ՀՀԿ» խմբակցությունը, թեև դեմ էր ծրագրին, միևնույն է, հայտարարել էր, որ կապահովի անհրաժեշտ ձայները:

Նախորդ՝ մայիս ամիսը տեղումնառատ էր: Անձրեւների պակաս չի զգացվի նաեւ ընթացիկ հունիսին:

«Մայիսին հանրապետության կարելի է ասել 90-95 տոկոսում տեղումների քանակը գերազանցել է ամսական նորման, իսկ առանձին հատվածներում՝ նույնիսկ կրկնակի: Բայց օդի ջերմաստիճանը մայիսին եղել է նորմայի սահմաններում, ջերմաստիճանի շեղումներ առանձնապես չենք ունեցել»,- «Հայկական ժամանակի» հետ զրույցում ասաց ՀՀ ԱԻՆ հիդրոմետ ծառայության օդերեւութաբանության կենտրոնի պետ Գագիկ Սուրենյանը՝ ավելացնելով, որ սակավաձյուն ձմռան պատճառով առաջացած ջրի խնդիրը նախորդ ամիս որոշակիորեն մեղմվել է, եւ գյուղատնտեսության մեջ ոռոգման անհրաժետություն առանձնապես չի եղել:

Անդրադառնալով ամռանը սպասվող եղանակային պայմաններին՝ Գագիկ Սուրենյանը պատասխանեց, որ կանխատեսումներն առայժմ վերաբերում են միայն հունիսին: Ըստ այդմ, տեղումները կլինեն առատ՝ հունիսին բնորոշ նորմայից ավելի, օդի ջերմաստիճանը՝ նորմայի սահմաններում. «Սպասվում է, որ օդի ջերմաստիճանը կլինի նորմայի սահմաններում: Դա նշանակում է, որ մեկ ամսվա ընթացքում ջերմաստիճանի հետ կապված անոմալիաներ չենք ունենալու, այսինքն՝ կլինի ոչ շատ ցածր ջերմային ֆոն, ոչ էլ շատ բարձր: Ունենալու ենք այնպիսի հունիս, որը համահունչ է մեր կլիմայական պայմաններին»:

Մասնավորապես՝ Արարատյան դաշտում ամսվա առաջին տասնօրյակում ցերեկային ժամերին հիմնականում կդիտվի +27 +29, երկրորդ տասնօրյակում՝ +29 +31, երրորդում՝ +30 +32 աստիճան:

Առաջիկա օրերին Հայաստանը կշարունակի գտնվել ցիկլոնի ազդեցության գոտում, ինչը կպահպանվի մինչեւ ամսի 10-ը ներառյալ: Բայց այս ցիկլոնի առանձնահատկությունն այն է, որ հիմնականում ակտիվանալու է երեկոյան եւ գիշերային ժամերին:

«Ցերեկային ժամերին հիմնականում կգերակշռի տաք, արեւային եղանակ, երեկոյան ժամերին պրոցեսը կզարգանա, աստիճանաբար կամպի, ամպրոպներ կսկսվեն: Շրջանների զգալի մասում կանխատեսվում են կարճատեւ անձրեւներ, առանձին հատվածներում չի բացառվում նաեւ կարկուտ: Օդի ջերմաստիճանը հունիսի 5-6-ին 2-3 աստիճանով բարձրանալու է: Երեւանում կհասնի մինչեւ +28 +30 աստիճանի, իսկ հունիսի 7-8-ն ընկած ժամանակահատվածում նույնքան կնվազի, այսինքն՝ նորից կդառնա +25 +27 աստիճան: Հետո կմնա անփոփոխ»,- մանրամասնեց Գագիկ Սուրենյանը:

«Եվրոստան-Ույուտ» ընկերությունը, արձագանքելով ՀՀ նախագահ Արմեն Սարգսյանի` Հայրենիքի պաշտպանի վերականգնողական կենտրոնում հնչեցրած մտահոգությանը՝ Կենտրոնում բուժվող զինվորներին արժանապատիվ կյանք վերադարձնելու անհրաժեշտության վերաբերյալ, հայտնում է, որ «Եվրոստան-Ույուտ» կազմակերպությունը պատրաստ է օժանդակել բուժում ստացող զինվորներին շինարարական եւ ճարտարագիտական ոլորտների ժամանակակից եւ պահանջված մասնագիտությունների ձեռքբերման, իսկ հետո նաեւ աշխատանքի տեղավորման հարցում:

Կազմակերպությունը Վերականգնողական կենտրոնում բուժում ստացող զինվորների համար կիրականացնի 3ds Max, AutoCAD, Photoshop համակարգչային ծրագրերի եռամսյա ուսուցում, կկազմակերպի արտադրական պրակտիկա կահույքի արտադրության, այլումինե եւ մետաղապլաստե դռների եւ պատուհանների արտադրության, ապակու մշակման, կոփման ոլորտներում: Արտադրական պրակտիկայի կազմակերպումը մասնագետ կադրերի գործնական պատրաստման կարեւորագույն փուլերից է: Պարտադիր ծրագրերից բացի նախագծի մասնակիցները ձեռք կբերեն աշխատանքի ինքնաներկայացման, CV-ի կազմման հմտություններ, աշխատանքի ընդունման նպատակով անցկացվող հարցազրույցների մասնակցության տեխնիկաներ, ինչպես նաեւ կծանոթանան խոշոր կազմակերպություններում կառավարչական գործընթացներում փաստաթղթերի ընթացակարգերի առանձնահատկություններին:

«Եվրոստան-Ույուտ» ընկերության թիմն արդեն հանդիպել է Հայրենիքի պաշտպանի վերականգնողական կենտրոնի ղեկավարության հետ, որի ընթացքում քննարկել են նախաձեռնության մանրամասներն ու հետագա անելիքները:

«Եվրոստան-Ույուտ» կազմակերպությունը հայաստանյան պետական եւ մասնավոր ընկերություններին կոչ է անում միանալ այս անհրաժեշտ եւ պատվաբեր նախաձեռնությանը՝ միասնական ու արդյունավետ լուծումներ առաջարկելու նպատակով: Նախաձեռնության ընթացքի մասին կարող եք տեղեկանալ հետեւելով մեր էջի նորություններին եւ ԶԼՄ-ի հրապարակումներին: Առաջարկների եւ տեղեկատվության համար կարող եք կապվել «Եվրոստան Ույուտ» ընկերության հասարակայնության հետ կապերի եւ լրատվության բաժին: +37410500561

Հունիսի 1-ին, ՀՀ կառավարությունը ներակայացրել և հավանություն է տվել կառավարության ծրագրին: ՀՀ ԱԺ նախագահին առաջարկվել է հունիսի 7-ին` ժամը 11-ին, գումարել արտահերթ նիստ, որի օրակարգում կընդգրկվի նաև ծրագրին հավանություն տալու հարցը:

Կառավարության ծրագրի՝ զինված ուժերին վերաբերող հատվածը՝ նույնությամբ.

«Զինված ուժերի մարտունակության և արդյունավետության բարձրացման կարևորագույն միջոցը բանակաշինության և զինվորական ծառայության շուրջ հաստատված մթնոլորտի ու մոտեցումների արմատական փոփոխությունն է։

• Ամբողջ պետական համակարգում, առավել ևս բանակում, արհեստավարժ անձնակազմի և զորակոչիկների շրջանում անհրաժեշտ է պարտականության զգացողությունը փոխարինել առաքելության զգացողությամբ։
• Յուրաքանչյուր սպա, ենթասպա և շարքային պետք է առաջնորդվի պետության և ժողովրդի առաջ ունեցած պատմական առաքելության գիտակցումով։ Զինված ուժերի յուրաքանչյուր հրամանատար և պաշտոնյա պետք է առաջնորդվի այդ առաքելությունը լավագույնս իրականացնելու նպատակով հասարակության և պետության կողմից հատկացված մարդկային, նյութական, ֆինանսական և այլ ռեսուրսները պետության և հասարակության անվտանգության ապահովմանը առավելագույն արդյունավետությամբ ծառայեցնելու գիտակցումով։
• Յուրաքանչյուր հրամանատար պետք է գիտակցի ծնողների կողմից իրեն վստահված զորակոչիկների կյանքի և անվտանգության ապահովման բարձր պատասխանատվությունը։
• Յուրաքանչյուր պաշտոնյա պետք է գիտակցի, որ հասարակության կողմից Զինված ուժերին հատկացված նյութատեխնիկական և ֆինանսական ռեսուրսները քաղաքացիների՝ սեփական սոցիալական, կրթական, առողջապահական և մյուս ոլորտներից խնայված և անվտանգության ապահովման առաջնահերթությունից ելնելով իրեն տրամադրված ռեսուրսներ են։ Եվ այս գիտակցության տարածումը կառավարությունը պետք է ապահովի սեփական գործունեության օրինակով։
• Զինված Ուժերը պետք է գործնականում զերծ մնան քաղաքական և ընտրական գործընթացների վրա որևէ հնարավոր ապօրինի ազդեցությունից: Զինված ուժերի անձնակազմը՝ շարքայինից մինչև գեներալ, պետք է հնարավորություն ունենա որպես Հայաստանի ազատ քաղաքացի ընտրություններում իր կամքը արտահայտել առանց ապօրինի ներգործությունների։

Քաղաքական նոր իրողություններից ելնելով՝ անհրաժեշտ է ճշգրտել ՀՀ Զինված ուժերի զարգացման պլանը և Սպառազինության, ռազմական տեխնիկայի զարգացման պետական ծրագիրը՝ հաշվի առնելով Զինված ուժերի մարտունակության բարձրացման գերակայությունը և  ուշադրություն դարձնելով առաջնահերթ լուծում պահանջող հետևյալ խնդիրներին․

• Անհրաժեշտ սպառազինությամբ, ռազմական տեխնիկայով և նյութատեխնիկական միջոցներով համալրվածությամբ, ռազմական կառավարման արդիական համակարգերի ներդրմամբ, ինչպես նաև անձնակազմի մարտական վարպետության բարձրացման նոր չափանիշների սահմանմամբ ՀՀ Զինված ուժերի մարտունակության մակարդակը բարձրացնել այնպես, որ այն համապատասխանեցվի ռազմական սպառնալիքների գնահատված (կանխատեսվող) մակարդակին և հավանական պատերազմի բնույթին՝ Հայաստանի Հանրապետության նկատմամբ զինված ոտնձգությունը զսպելու և կանխելու, իսկ պատերազմի ժամանակ՝ ռազմական գործողությունները հնարավորինս վաղ փուլում և ՀՀ համար շահավետ պայմաններով դադարեցնելու նպատակով:
• Առաջնագիծը շարունակաբար համալրել արդիական տեխնիկական միջոցներով և մարտական հերթապահության արդյունավետությունն ու անվտանգությունը բարձրացնել այնպես, որ հակառակորդի կողմից դիտարկվող հատվածները հասնեն նվազագույնի, իսկ հերթապահությունում ընդգրկված անձնակազմի անվտանգության աստիճանը՝ առավելագույնի։
• Անձնակազմի հետ տարվող աշխատանքների որակը և արդյունավետությունը բարձրացնել այնպես, որ էականորեն բարձրանա Զինված ուժերի անձնակազմի բարոյահոգեբանական պատրաստվածության մակարդակը, կարգապահությունը, ապահովվի Զինված ուժերում մարդու իրավունքների պաշտպանությունը, նվազագույնի հասնեն ոչ կանոնագրային հարաբերությունները, դրանց հետևանքով զինծառայողների արժանապատվության խոցումը, ինքնավնասման և ինքնասպանության (ինքնասպանության փորձերի) դեպքերը։

Այս նպատակի իրագործման համար կարևորագույն խնդիր է նաև ժամկետային զինծառայողների կրթության շարունակականության ապահովումը զինվորական ծառայության ողջ ընթացքում։ Զինվորի կրթական ցենզի բարձրացումը և ինտելեկտուալ մակարդակի աճը պետք է լինի Զինված ուժերի զարգացման ռազմավարության կարևորագույն ուղղություն։

• Ժամկետային զինծառայողների պատշաճ և ամբողջական նյութական բավարարումը կազմակերպել այնպես, որ ժամկետային զինծառայողների ծնողները ստիպված չլինեն շոշափելի մասնակցություն ունենալ այդ գործընթացին։ Շարքային կազմի իրավունքների պաշտպանությունը, թիկունքային, նյութատեխնիկական և բժշկական ապահովումը պետք է լինի Զինված ուժերի ղեկավարության հոգածության ու ուշադրության առարկա և մնան հասարակության վերահսկողության ուշադրության կենտրոնում:
• Բարձրացնել զինծառայողների սոցիալական պաշտպանվածության մակարդակը, իրականացնել բնակարանային և բժշկական ապահովման և այլ ծրագրեր ՝ պետական եկամուտների աճի ծավալներին զուգընթաց։ Զինված ուժերի կարևորագույն խնդիրներից է նաև բանակի ապաքաղաքականացման և չեզոքության պահպանման սահմանադրական պահանջի իրագործումը։
• Միջազգային ինտեգրման և հավաքական անվտանգության գործող ընթացակարգերի հնարավորություններն ընդլայնելու նպատակով զարգացնել ռազմաքաղաքական դաշինքներն ու գործընկերությունները՝ պահպանելով ՀՀ ազգային շահերից բխող և առկա ռազմաքաղաքական ընդհանրությունների վրա հիմնված հարաբերությունների ձևավորման հավասարակշռությունը»:

Կառավարության ծրագրի՝ արտաքին քաղաքականությանը վերաբերող դրույթները՝ այստեղ:

Razm.info-ն, հիմնվելով արբանյակային լուսանկարների վրա, ամբողջացրել է մայիս ամսվա ընթացքում հայ-ադրբեջանական սահմանի նախիջևանյան ուղղությամբ տեղի ունեցած ադրբեջանական դիրքերի տեղաշարժերը:

Կայքն ընդգծում է` ադրբեջանական դիրքերն առաջ տանելու ուսումնասիրված բոլոր դեպքերը նախկին Նախիջևանի Ինքնավար Խորհրդային Սոցիալիստական հանրապետության սահմաններում են (Նախիջևանի տարածքում)։

«Խոսքը միայն ու միայն ոչ մի կողմից չվերահսկվող բարձունքներում դիրքավորվելու մասին է, հայկական որևէ դիրքի կորուստ մեր ուսումնասիրած լուսանկարներում չի դիտարկվում։

Նշենք նաև, որ չենք անդրադառնում հայկական կողմի գործողություններին, քանի որ դրանց մասին պաշտոնական աղբյուրներից մանրամասներ դեռևս չկան։

Զննել ենք ս.թ. մայիսի 2–27 ժամանակամիջոցում արված արբանյակային լուսանկարներում երևացող փոփոխությունները, մասնավորապես՝ ադրբեջանական կողմից դեպի նոր դիրքեր տանող նոր ճանապարհների հայտնվելը, ինչը խոսում է սեղմ ժամկետներում իրագործած ինժեներական աշխատանքների մասին:

Ըստ ուսումնասիրության՝ Ադրբեջանի ԶՈւ-ն հիմնականում առաջացել է Արենի գյուղի այգիների և լքված Հունուտ (ադրբ. Ջունութ) գյուղի ուղղություններով: Առաջխաղացման նշաններ նկատվում են մայիսի 2-ից սկսած, սակայն հիմնական աշխատանքները կատարվել են մայիսի 17–27 հատվածում:

Առաջխաղացման ուղղությունները ավելի պարզ ցույց տալու համար առանձնացրել են պայմանական A, B և C հատվածները: (Լուսանկարների միջև փոփոխությունները տեսնելու համար շարժեք նկարի մեջտեղի ուղղահայաց սպիտակ գիծը)։

A. Տե´ս. 2 մայիսի, 2018 թ. / 27 մայիսի, 2018 թ. լուսանկարների համեմատություն (բարձր խտության լուսանկարներով)

Հունուտի ուղղությամբ առաջանալով` ադրբեջանական կողմը կառուցել է 5 նոր ճանապարհ, որոնք ամենայն հավանականությամբ տանում են դեպի նոր զբաղեցրած դիրքերը: Նախկինում այս հատվածում միջդիրքային տարածությունը 4.5–5 կմ էր, այժմ հայկական և ադրբեջանական դիրքերի միջև հեռավորությունը կրճատվել է մինչև 750–1600 մետրի: Նշենք, որ հայկական դիրքերը տեղակայված են հենց լքված Հունուտ գյուղի տարածքում:

Այս հատվածում ինժեներական աշխատանքների հետքեր նկատվում են մայիսի 2–17-ը ընկած հատվածում, սակայն հիմնական շինարարությունը իրագործվել է մայիսի 17–27-ը ժամանակահատվածում:

B. Տե´ս. 17 մայիսի, 2018 թ. / 27 մայիսի, 2018 թ. լուսանկարների համեմատություն (բարձր խտության լուսանկարներով)

Մայիսի 17-ից հետո ադրբեջանական կողմը ձեռնարկում է ինժեներական աշխատանքներ Արենիի ուղղությամբ՝ նոր ճանապարհ բացելով դեպի արևելք ու դիրքավորվելով երկու հայկական դիրքերի միջև գտնվող բարձուքում։

Հարկ է նշել, որ Արենի գյուղն իր մատույցներով բավականին հեռու է ադրբեջանական նոր դիրքերից, և հրաձգային զենքի համար գործնականում անհասանելի»,- գրում է Razm.info-ն:

Ուսումնասիրությունն ամբողջությամբ` սկզբանղբյուր կայքում:

«ԳեոՊրոՄայնինգ գոլդ» ընկերությունը, որը Հայաստանում շահագործում է Սոթքի հանքը և Արարատի ոսկու կորզման ֆաբրիկան, ինչպես նաև Ագարակի պղնձա-մոլիբդենային կոմբինատը, հաղորդում է այն մասին, որ Սոթքի հանքում արտադրությունը կանգ է առել։ Արտադրության կանգ առնելու պատճառը տեղի մի խումբ կողմնակի անձանց գործողություններն են։ Ընկերության մամուլի ծառայության հաղորդագրության մեջ նշվում է, որ մայիսի 17-18-ը, ինչպես նաև մայիսի 22-ից մինչև այսօր մի խումբ անձինք, իրենց գործողությունները մոտիվացնելով քաղաքական և ազգայնական լոզունգներով, փակել են դեպի հանք տանող ճանապարհները և տեխնիկայի մուտքը դեպի վառելիքա-քսայուղային նյութերի կայան։ Նրանք փակել են նաև Սոթք-Արարատ երկաթուղային ճյուղ տանող ճանապարհը, որով իրականացվում է հանքաքարի ամենօրյա փոխադրումը Սոթքի հանքից դեպի Արարատի ֆաբրիկա։

«Հանքաքարի արդյունահանման դադարեցումը իր հետ բերել է նաև «Հարավ-կովկասյան երկաթուղի» ՓԲ ընկերության կողմից շահագործվող Սոթք-Արարատ երկաթուղային ճյուղի պարապուրդ (Հարավ-կովկասյան երկաթուղին Ռուսական երկաթուղու դուստր ձեռնարկությունն է Հայաստանում), որն ապահովում է նրա հասույթի գրեթե կեսը։ Ստեղծված իրավիճակում «ԳեոՊրոՄայնինգ գոլդ» ընկերությունը ստիպված է կանգնեցնել նաև արտադրությունը Արարատի ոսկու կորզման ֆաբրիկայում»,-նշված է հաղորդագրության մեջ:

Արտադրության սաբոտաժի մասնակիցները առաջ են քաշում տարբեր ուլտիմատիվ ազգայնական պահանջներ և ընկերության ղեկավարությանը ու աշխատողներին ենթարկում շանտաժի, հնչեցնում սպառնալիքներ։ «Բողոքողների իրական նպատակն այն է, որպեսզի «ԳեոՊրոՄայնինգ գոլդ» ընկերության ղեկավարությունը թույլատրի նրանց մուտքը հանքի տարածք՝ ոսկու անօրինական արդյունահանում իրականացնելու համար: Բողոքողների կողմից շանտաժի իրական արդյունքը, իշխանության անգործության պայմաններում, դարձավ ձեռնարկության աշխատանքի դադարեցումը, աշխատողների աշխատավարձերի կորուստը, իսկ պետության համար՝ շահույթի, օգտակար հանածոների արդյունահանման դիմաց վճարվող հարկերի, բոլոր մակարդակներում սոցիալական վճարների կորուստը, երկրում ներդրումային մթնոլորտի վատթարացումը»,-տեղեկացրին ընկերությունից:։

2007թ․ «ԳեոՊրոՄայնինգ» ընկերությունների խումբը սույն արտադրական կոմպլեքսը ձեռք բերեց աղետալի վիճակում՝ պետության և աշխատանքային կոլեկտիվի նկատմամբ ունեցած պարտքերով։ Հայաստանում աշխատանքի 10 տարիների ընթացքում ընկերությունը ձեռնարկության զարգացման և արդիականացման ուղղությամբ ներդրել է ավելի քան 505 միլիոն ԱՄՆ դոլար, դառնալով ՀՀ տնտեսության խոշորագույն ներդրողներից մեկը։ Արդյունքում, այսօր ընկերության աշխատողների թիվը հասնում է 2000-ի, իսկ Հայաստանի բյուջե վճարվող հարկերը անցնում են 200 միլիոն ԱՄՆ դոլարը։ Միայն 2017 թվականին ԳեոՊրոՄայնինգը պետական բյուջե է վճարել մոտ 27 միլիոն ԱՄՆ դոլար և ընդգրկվել երկրի հինգ խոշոր հարկ վճարողների թվում։

«ԳեոՊրոՄայնինգը» անհանգստանում է իր աշխատողների ֆիզիկական անվտանգության վերաբերյալ հնչող սպառնալիքների համար և ՀՀ Կառավարությանը և ուժային կառույցներին կոչ է անում կանգնել ի պաշտպանություն պետության և օտարերկրյա ներդրողների շահերի, որոնք տեղերում սոցիալական ծրագրեր են իրականացնում։ Ընկերությունը պետության կողմից աջակցության հույս է հայտնում, ակնկալելով, որ Հայաստանում «ԳեոՊրոՄայնինգ» ընկերությունների խմբի արդյունաբերական ձեռնարկությունների կայուն, առանց խոչընդոտների աշխատանքը ապահովելու համար միջոցներ կձեռնարկվեն։

Հայաստանի Հանրապետության վարչապետ Նիկոլ Փաշինյանը հանձնարարել է լուծել զինված ուժերում սննդի և զինծառայողներին տրամադրվող հագուստի որոշ պարագաների որակը: ՀՀ վարչապետն այս մասին հայտնեց կառավարության հետ հարցուպատասխանի ժամանակ՝ պատասխանելով ՀՀԿ խմբակցության պատգամավոր Ջեմմա Բաղդասարյանի հարցին: «Կան խնդիրներ, որոնք առաջիկայում պետք է լուծվեն: Մասնավորապես, զինվորներին տրամադրվող և սննդի, և  հագուստի որոշ պարագաների որակի հարցը: Այդ հարցով արդեն հանձնարարել  եմ, որ լրջորեն զբաղվեն, որովհետև կան մեխանիզմներ, որոնց նպատակահարմարությունը խիստ կասկածի տակ է, և մենք պետք է այս հարցում արդյունավետությունը բարձրացնենք: Ես ակնկալում եմ նաև ծնողների ակտիվությունը, որովհետև շատ դեպքերում պաշտոնական զեկույցներով հասնող տեղեկատվությունն ունի պրակտիկ ստուգման կարիք և դրա ամենաարդյունավետ խողովակը անմիջապես զինվորների ծնողներից տեղեկատվություն ստանալն է: Ես նրանց կոչ եմ անում ակտիվորեն համագործակցել կառավարության հետ»,- ասաց Փաշինյանը:

Վարչապետն անդրադարձավ նաև զինծառայողներին հիգիենայի անհրաժեշտ պարագաներով ապահովելու խոստմանը՝ հիշեցնելով, որ իր առաջին գործերից մեկը եղել է այն, որ հրավիրել է զինված ուժերի գլխավոր շտաբի ներկայացուցիչներին քննարկելու այդ հարցը: «Ես արել եմ հայտարարություն ու ծնողներին խնդրում եմ իրենց երեխաներին չուղարկել այն պարագաները, որոնցով ապահովելու պարտավորությունը կրում է պետությունը: Իսկ եթե զինվորները զանգում են և ասում, որ կարիք ունեն նման պարագաների, ես պնդել եմ, որ նրանք դիմեն մամուլին, որպեսզի մենք արագ արձագանքենք և հետևություններ անենք: Զինված ուժերի  գլխավոր շտաբի կողմից արվել են հավաստիացումներ, որ իրենք ի վիճակի են ամբողջությամբ բավարարել այն կարիքները, որոնց բավարարման պարտավորությունը կրում են օրենսդրությամբ»,- ասաց նա:

Նիկոլ Փաշինյանն ընդգծեց, որ երբեմն ծագում են նաև անսպասելի խնդիրներ, որովհետև  վարչապետի կողմից տրված հրամաններն ու հանձնարարականները բանակի պաշտոնյաների կողմից մեկնաբանվում են շատ կամայական, ես ցանկանում եմ հրապարակային ասել, որ այն, ինչ ասում եմ, ոչ թե զինվորների կյանքը բարդացնելու այլ նրանց կյանքը հեշտացնելու մասին է: Հրամանատարներին կոչ եմ անում այդ հրահանգները հակառակ կերպ չմեկնաբանել»,- ասաց նա:

Արձագանքելով ՀՀ վարչապետի պատասխանին՝ Ջեմմա Բաղդասարյանը շեշտեց, որ խնդիրը բոլորի համար շատ կարևոր նշանակություն ունի՝ խոստանալով հետամուտ լինել, որ տրված խոստումները կատարվելու են:

ՀՀ վարչապետն էլ ընդգծեց, որ դրա համար միայն շնորհակալ կլինի: «Իրականում կան խնդիրներ, որոնց լուծմամբ զինված ուժերի գլխավոր շտաբը ինտենսիվորեն զբաղվում է: «Մենք նպատակ ենք դրել պետական եկամուտներն ավելացնել, իսկ դա ունենալու է իր ազդեցությունը մեր կյանքի բոլոր ոլորտներում,  ինչպես նաև զինված ուժերում»,- եզրափակեց Նիկոլ Փաշինյանը: