Անչափահասների կարիքներին հարմարեցված պատժամիջոցներ ՀՀ-ում գոյություն չունեն. Սիրանույշ Սահակյան
Անչափահասների կարիքներին հարմարեցված պատժամիջոցներ ՀՀ-ում գոյություն չունեն. Սիրանույշ Սահակյան Հուլիս 03, 2012 | 18:14

«Քաղաքացիական հասարակության ինստիտուտ» հասարակական կազմակերպությունը կատարած ուսումնասիրության արդյունքում, այն  եզրահանգումներին է եկել, որ ՀՀ-ում անչափահասների արդարադատության համակարգը զգալիորեն տարբերվում է միջազգայնորեն ընդունված չափանիշներից և ՀՀ-ի անչափահասների արդարադատությունն աչքի է ընկնում մի շարք բացթողումներով:

Այսօր, կազմակերպության փորձագետ Սիրանույշ Սահակյանը, լրագրողներին ներկայացնելով, «Անչափահասների գործերով արդարադատությունը Հայաստանի օրենսդրությունում» ուսումնասիրությունը, նշեց, որ սխալ կլինի ասել, թե ՀՀ-ում առհասարակ անչափահասների առանձնահատկությունները հաշվի չեն առնվում արդարադատություն իրականացնելիս։

Սակայն, ըստ նրա, համակարգի վերաբերյալ համապարփակ կարգավորումներ մեր օրենսդրության մեջ առկա չեն:

Սիրանույշ Սահակյանը տեղեկացրեց, որ մի քանի գլուխներ նախատեսված են քրեական օրենսգրքով ու քրեական դատավարության օրենսգրքով, որոնք պարտավորեցնում են վարույթ իրականացնող մարմիններին որոշակի առանձնահատկություններ հաշվի առնել: Բայց դրանք, ըստ նրա բավարար չեն:

«Անչափահասների կարիքներին հարմարեցված պատժամիջոցներ ՀՀ-ում գոյություն չունեն: Մասնավորապես անչափահասների նկատմամբ կարող են կիրառվել տուգանքը, հանրային աշխատանքը, կալանքը և որոշակի ժամանակով ազատազրկումը»,– ասաց նա:
«Տուգանքը և հանրային աշխատանքը չեն կարող արդյունավետ լինել անչափահասի նկատմամբ կիրառելու դեպքում: Առաջին դեպքում նյութական միջոցներ չունենալու պատճառով խեղաթյուրվում է անձնական պատասխանատվության սկզբունքը և հետո տուգանքը վճարում են ծնողները, երկրորդ դեպքում՝ աշխատանքային օրենսդրությամբ նախատեսված են սահմանափակումներ անչափահասների կատարած աշխատանքների նկատմամբ »,- ավելացրեց նա:Սիրանույշ Սահակյանը նկատեց, որ անհրաժեշտ է, որպեսզի ՀՀ-ում մշակվեն այլընտրանքային պատժատեսակներ, որոնք հարմարեցված կլինեն անչափահասների կարիքներին և օրենսդրությունը չի խախտի կամ հակասի օրենսդրության այլ ճյուղերով նախատեսված սկզբունքները:

«Այլընտրանքային պատժատեսակները շատ են՝ տնային կալանք, կիսաազատություն և այլն: Տարբեր երկրներում բավականին ընդլայնված ցանկ կա, պարզապես դրա ներդրումն է անհրաժեշտ ներմուծել ՀՀ օրենսդրություն»,- ասաց նա:

Փորձագետը ցավով նշեց, որ Հայաստանում գոյություն չունի անչափահասների գործերը քննող մասնագիտացված դատարան և դրանք բոլորը իրականացվում են ընդհանուր իրավասության դատարանում:Միևնույն ժամանակ նա հավաստեց, որ այս պահին նման դատարան հիմնելու անհրաժեշտությունը մեծ չէ, քանի որ անչափահասների կողմից կատարվող իրավախախտումների քանակը այդքան էլ շատ չէ:

 

 


Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *

Լուրեր
Փողը պակասում է

01.10.2014 | 11:02

Top լուրեր